დღეს, ჯოკია მეშველიანის სახელობის ლენტეხის კულტურის სახლის წინ ჯოკია და გელა გუგავას სახელობის ფოლკლორულ ანსამბლ ,,ლაგუშედას’’, ჯოკია მეშველიანის სახელობის ანსამბლ,,ლილეს’’ და შურმან ბენდელიანის სახელობის ბავშვთა ქორეოგრაფიულ ანსამბლ,, ცერულს’’ ვარსკვლავი გაუხსნეს.
ეს ანსამბლები წლების განმავლობაში ინარჩუნებდნენ და ავითარებდნენ ჩვენი კუთხის უნიკალურ კულტურულ მემკვიდრეობას. მათი შესრულებები, ფოლკლორული სიმღერები და ტრადიციული ცეკვები, არა მხოლოდ სვანეთის, არამედ მთელი საქართველოს სიამაყეა.
ამ გამორჩეული ანსამბლების ღვაწლის აღსანიშნავად , გაიხსნა ვარსკვლავი, რომელიც მრავალწლიანი შრომის, ხელოვნებისადმი თავდადებისა და კულტურული ტრადიციების შენარჩუნების აღიარებაა.ცერემონიაზე ანსამბლებს ასევე გადაეცათ სიგელები, რაც მათ წვლილს კიდევ უფრო ხაზს უსვამს ქართული კულტურის განვითარების საქმეში.
ეს ჯილდო ეკუთვნის , როგორც კონკრეტულ შემსრულებლებსა და ხელმძღვანელებს, ისე მთელ სვანეთსა და მის ტრადიციებს, რაც კიდევ ერთხელ შეგვახსენებს ჩვენი კუთხის ხელოვნების სიძლიერესა და მდიდარ ისტორიას.,,დღეს ყველამ ერთად პატივი მივაგეთ და მოვეფერეთ ადამიანებს, რომლებმაც თავიანთი წვლილი შეიტანეს სვანეთის კულტურულ ცხოვრებაში. ეს არის ადგილი, რამეთუ ნიჭთან ერთად, დიდი ოსტატობაც არის საჭირო, რომ დიდხანს და ლამაზად დარჩე მაყურებლის მეხსიერებაში. კიდევ ერთხელ გილოცავთ ამ საზეიმო დღეს.’’- გია ონიანი
ჯოკია მეშველიანის სახელობის კულტურის სახლის სცენაზე, აღნიშნულ ფოლკლორულ ანსამბლებთან ერთად, საზეიმო ღონისძიებაში მონაწილეობა მიიღეს ცაგერის ქორეოგრაფიულმა ანსამბლებმა ,,ლეჩხუმი’’(ხელ-ლი: ზ. ჩანქსელიანი), ,,ახალი თაობა’’( ხელ-ლი: ი. კვირიკაშვილი) და ცაგერის მამაკაცთა ფოკლორულმა ანსამბლმა ,,სალაღობო’’(ხელ-ლი: ზ.ყურაშვილი).
ღონისძიება ლენტეხის მუნიციპალიტეტის მერის, გია ონიანის ინიციატივით და ანზორ ერქომაიშვილის სახელობის ფოლკლორის სახელმწიფო ცენტრის მხარდაჭერიტ გაიმართა.
ვარსკვლავის გახსნას, ლენტეხის მუნიციპალიტეტის მერი გია ონიანი, ფოლკლორის ცენტრის ხალხური მუსიკის მიმართულების ხელმძღვანელი, ეთნომუსიკოლოგი ნანა ვალიშვილი, მერის პირველი მოადგილე მარადი ლიპარტელიანი, მერის მოადგილე ზვიად ლობჟანიძე, ადგილობრივი თვითმმართველობის წარმომადგენლები და მოწვეული სტუმრები ესწრებოდნენ.
ღონისძიება საზეიმო ფოიერვერკით დასრულდა.
